ਓਮਾਨ ਸਾਗਰ 'ਚ ਭਾਰਤੀ ਮਲਾਹਾਂ ਦੀ ਮੌਤ: ਅਮਰੀਕੀ ਰਾਸ਼ਟਰਪਤੀ ਦੇ ਦੋਸ਼ਾਂ 'ਤੇ ਈਰਾਨ ਦਾ ਇਨਕਾਰ
ਤਹਿਰਾਨ: ਓਮਾਨ ਸਾਗਰ ਦੇ ਤੱਟ 'ਤੇ ਇੱਕ ਤੇਲ ਕੰਪਨੀ 'ਤੇ ਹੋਏ ਹਮਲੇ 'ਚ ਤਿੰਨ ਭਾਰਤੀ ਮਲਾਹਾਂ ਦੀ ਮੌਤ ਲਈ ਈਰਾਨ ਨੂੰ ਜ਼ਿੰਮੇਵਾਰ ਠਹਿਰਾਉਣ ਵਾਲੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਦੋਸ਼ਾਂ ਨੂੰ ਈਰਾਨ ਨੇ ਸਖ਼ਤੀ ਨਾਲ ਰੱਦ ਕਰ ਦਿੱਤਾ ਹੈ।
ਅਮਰੀਕੀ ਰਾਸ਼ਟਰਪਤੀ ਟਰੰਪ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਟਰੁੱਥ ਸੋਸ਼ਲ' 'ਤੇ ਪੋਸਟ ਕਰਦਿਆਂ ਕਿਹਾ ਸੀ ਕਿ ਹਾਰਮੁਜ਼ ਜਲਡਮਰੂ ਤੋਂ ਲੰਘ ਰਹੇ ਭਾਰਤੀ ਜਹਾਜ਼ਾਂ 'ਤੇ ਈਰਾਨ ਵੱਲੋਂ ਡਰੋਨ ਹਮਲਾ ਕੀਤਾ ਗਿਆ, ਜੋ ਬਰਦਾਸ਼ਤ ਤੋਂ ਬਾਹਰ ਹੈ।
ਇਸ ਦੇ ਜਵਾਬ 'ਚ ਈਰਾਨ ਦੇ ਮੁੱਖ ਬੁਲਾਰੇ ਇਸਮਾਈਲ ਬਗਾਈ ਨੇ ਐਕਸ (ਪਹਿਲਾਂ ਟਵਿੱਟਰ) 'ਤੇ ਪੋਸਟ ਕਰਦਿਆਂ ਕਿਹਾ ਕਿ ਅਮਰੀਕਾ ਵੱਲੋਂ ਭਾਰਤੀ ਵਪਾਰਕ ਜਹਾਜ਼ਾਂ 'ਤੇ ਕੀਤੇ ਗਏ ਭਿਆਨਕ ਹਮਲਿਆਂ 'ਚ ਤਿੰਨ ਭਾਰਤੀ ਮਾਰੇ ਗਏ ਹਨ। ਇਹ ਅਮਰੀਕਾ ਦੀ ਹਥਿਆਰਬੰਦ ਸਮੁੰਦਰੀ ਡਾਕਾ ਨੀਤੀ ਦਾ ਸਪੱਸ਼ਟ ਸਬੂਤ ਹੈ। ਉਨ੍ਹਾਂ ਮਰਨ ਵਾਲਿਆਂ ਦੇ ਪਰਿਵਾਰਾਂ ਅਤੇ ਭਾਰਤ ਸਰਕਾਰ ਪ੍ਰਤੀ ਸੰਵੇਦਨਾ ਪ੍ਰਗਟ ਕੀਤੀ ਅਤੇ ਕਿਹਾ ਕਿ ਅੰਤਰਰਾਸ਼ਟਰੀ ਭਾਈਚਾਰੇ ਨੂੰ ਅਮਰੀਕਾ ਨੂੰ ਇਨ੍ਹਾਂ ਗੈਰ-ਕਾਨੂੰਨੀ ਕਾਰਵਾਈਆਂ ਲਈ ਜਵਾਬਦੇਹ ਠਹਿਰਾਉਣਾ ਚਾਹੀਦਾ ਹੈ।
ਭਾਰਤ 'ਚ ਈਰਾਨੀ ਦੂਤਘਰ ਨੇ ਵੀ ਇੱਕ ਬਿਆਨ 'ਚ ਕਿਹਾ ਕਿ ਹਾਰਮੁਜ਼ ਜਲਡਮਰੂ 'ਚ ਭਾਰਤੀ ਜਹਾਜ਼ਾਂ ਬਾਰੇ ਅਮਰੀਕੀ ਰਾਸ਼ਟਰਪਤੀ ਦੇ ਦੋਸ਼ ਪੂਰੀ ਤਰ੍ਹਾਂ ਬੇਬੁਨਿਆਦ ਹਨ, ਅਤੇ ਇਹ ਇੱਕ ਹਫ਼ਤੇ 'ਚ ਅਮਰੀਕਾ ਵੱਲੋਂ ਤਿੰਨ ਭਾਰਤੀ ਜਹਾਜ਼ਾਂ 'ਤੇ ਹਮਲਾ ਕਰਕੇ ਤਿੰਨ ਮਾਸੂਮ ਭਾਰਤੀ ਮਲਾਹਾਂ ਨੂੰ ਮਾਰਨ ਦੇ ਭਿਆਨਕ ਸੱਚ ਤੋਂ ਧਿਆਨ ਭਟਕਾਉਣ ਦੀ ਕੋਸ਼ਿਸ਼ ਹੈ।
ਕੀ ਹੋਇਆ ਸੀ?
ਪ੍ਰਸ਼ਾਂਤ ਮਹਾਸਾਗਰ 'ਚ ਸਥਿਤ ਟਾਪੂ ਦੇਸ਼ ਪਾਲਾਉ ਦਾ ਝੰਡਾ ਲਹਿਰਾਉਣ ਵਾਲਾ ਤੇਲ ਜਹਾਜ਼ 'ਐਮਟੀ ਸੈਟੇਬੈਲੋ' ਹਾਰਮੁਜ਼ ਜਲਡਮਰੂ ਤੋਂ ਲੰਘ ਕੇ ਈਰਾਨੀ ਬੰਦਰਗਾਹ 'ਚ ਦਾਖ਼ਲ ਹੋਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਜਹਾਜ਼ 'ਤੇ 28 ਮਲਾਹ ਸਨ, ਜਿਨ੍ਹਾਂ 'ਚੋਂ 24 ਭਾਰਤੀ ਸਨ। ਅਮਰੀਕੀ ਫੌਜ ਨੇ ਦੋਸ਼ ਲਾਇਆ ਕਿ ਜਹਾਜ਼ ਨੇ ਦਿੱਤੇ ਗਏ ਨਿਰਦੇਸ਼ਾਂ ਦੀ ਪਾਲਣਾ ਨਹੀਂ ਕੀਤੀ, ਜਿਸ ਤੋਂ ਬਾਅਦ ਅਮਰੀਕੀ ਲੜਾਕੂ ਜਹਾਜ਼ ਨੇ ਜਹਾਜ਼ ਦੇ ਇੰਜਣ ਕਮਰੇ 'ਤੇ ਬੰਬ ਸੁੱਟ ਕੇ ਉਸ ਨੂੰ ਅਯੋਗ ਕਰ ਦਿੱਤਾ। ਇਸ ਹਮਲੇ 'ਚ ਭਾਰਤੀ ਮਲਾਹ ਆਦਿਤਿਆ ਸ਼ਰਮਾ, ਸ਼ਿਵਾਨੰਦ ਸੌਰੇਸ਼ੀਆ ਅਤੇ ਮੁੱਖ ਇੰਜੀਨੀਅਰ ਬਟਨਾਲਾ ਸੁਰੇਸ਼ ਦੀ ਮੌਤ ਹੋ ਗਈ।
ਭਾਰਤੀ ਸ਼ਿਪਿੰਗ ਮੰਤਰੀ ਸਰਵਾਨੰਦ ਸੋਨੋਵਾਲ ਨੇ ਐਕਸ 'ਤੇ ਕਿਹਾ, 'ਸੈਟੇਬੈਲੋ' 'ਤੇ ਹਮਲੇ 'ਚ ਤਿੰਨ ਭਾਰਤੀ ਮਲਾਹਾਂ ਦੀ ਮੌਤ ਬਹੁਤ ਦੁਖਦਾਈ ਹੈ। ਮੋਦੀ ਸਰਕਾਰ ਪੀੜਤਾਂ ਦੇ ਪਰਿਵਾਰਾਂ ਨਾਲ ਖੜ੍ਹੀ ਹੈ। ਮੈਂ ਅਧਿਕਾਰੀਆਂ ਨੂੰ ਬਚਾਏ ਗਏ ਭਾਰਤੀ ਮਲਾਹਾਂ ਦੀ ਵਤਨ ਵਾਪਸੀ ਯਕੀਨੀ ਬਣਾਉਣ ਅਤੇ ਮ੍ਰਿਤਕਾਂ ਦੀਆਂ ਲਾਸ਼ਾਂ ਨੂੰ ਜਲਦ ਤੋਂ ਜਲਦ ਭਾਰਤ ਲਿਆਉਣ ਦੇ ਹੁਕਮ ਦਿੱਤੇ ਹਨ।'
ਭਾਰਤ ਨੇ ਇਸ ਘਟਨਾ 'ਤੇ ਡੂੰਘੀ ਚਿੰਤਾ ਪ੍ਰਗਟ ਕੀਤੀ ਹੈ ਅਤੇ ਖੇਤਰ 'ਚ ਤਣਾਅ ਘਟਾਉਣ ਦੀ ਮੰਗ ਕੀਤੀ ਹੈ। ਦਿੱਲੀ 'ਚ ਅਮਰੀਕੀ ਰਾਜਦੂਤ ਨੂੰ ਬੁਲਾ ਕੇ ਭਾਰਤੀ ਮਲਾਹਾਂ 'ਤੇ ਹਮਲੇ ਲਈ ਕੜਾ ਵਿਰੋਧ ਦਰਜ ਕਰਵਾਇਆ ਗਿਆ।